Fərman Həsənov: “Azərbaycanda məğlub olmağı ağlımdan belə keçirmirəm”

"Hazırlıqlar çox yüksək səviyyədə davam edir”.  

QELEBE.AZ xəbər verir ki, bu sözləri azərbaycanlı MMA döyüşçüsü Fərman Həsənov Mütləq Döyüş Çempionatının (UFC) Bakıda təşkil olunacaq turniri ilə bağlı danışarkən deyib.

Mətbuat konfransına qoşulan idmançı döyüş barədə fikirlərini bölüşüb:

“Doğma vətənimdə məğlub olmağı heç ağlımdan belə keçirmirəm. Döyüşə 100 faiz hazıram. Hazırda məşqlərimiz intensiv şəkildə davam edir. Ölkəmizi layiqincə təmsil etmək niyyətindəyəm. Məqsədim bayrağımızı ən yüksək zirvəyə qaldırmaqdır. UFC-dəki ilk döyüşümdən öncə də Tofiq Musayevlə bir çox söhbətlərimiz olub. Rəqibimə UFC-də beşinci məğlubiyyətini yaşadacağam".

Qeyd edək ki, “UFC Fight Night” iyunun 27-də Milli Gimnastika Arenasında təşkil olunacaq. Fərman Həsənovun rəqibi ABŞ-li Erik Nolan olacaq.