Qərb derbisini qazanan "Turan Tovuz" 4-cü pilləyə yüksəlib

Futbol üzrə Azərbaycan Premyer Liqasında VI tura start verilib.

"QELEBE.AZ"un məlumatına görə, açılış matçında "Turan Tovuz" evdə "Kəpəz"i qəbul edib. Tovuz şəhər stadionunda oynanılan Qərb derbisi meydan sahiblərinin 2:0 hesablı qələbəsi ilə başa çatıb.

Tovuz təmsilçisindən hər iki qolu Runi Eva vurub. 39-cu dəqiqədə hesabı açan kamerunlu hücumçu 77-ci dəqiqədə penaltidən fərqlənməklə son nöqtəni qoyub.

Bu qələbədən sonra xallarını 10-a çatdıran "Turan Tovuz" 4-cü pilləyə yüksəlib. Xalı olmayan "Kəpəz" isə sonuncudur.

Qeyd edək ki, turun digər 4 matçı şənbə və bazar günləri oynanılacaq. Sentyabrın 10-da "Qəbələ" - "Neftçi" və "Səbail" - "Zirə", 1 gün sonra isə "Sumqayıt" - "Şamaxı" və "Qarabağ" - "Sabah" oyunları baş tutacaq.