İlqar Qurbanov: “Zəlzələ olanda yayılan səs indiyə kimi qulaqlarımdan getmir”

“1999-cu ildə səhər saatlarında zəlzələ olanda yayılan səs indiyə kimi qulaqlarımdan getmir”.

Bunu “QELEBE.AZ”a açıqlamasında Türkiyənin “Fənərbağça” klubunun yetirməsi olan Azərbaycan millisinin sabiq futbolçusu İlqar Qurbanov 1999-cu ildə İstanbulda baş verən zəlzələ barədə danışarkən deyib.

2000-2004-cü illərdə “Fənərbağça”nın akademiyasında çıxış edən Qurbanov 20 000-ə yaxın adamın həlak olduğu 1999-cu ildəki zəlzələni belə xatırlayıb: “O hissi çox yaxşı bilirəm. 1999-cu ildə yaşanan faciəvi zəlzələ zamanı mən də İstanbulda yaşayırdım. Həmin vaxt uşaq olsam da, bunun acısını hiss etmişəm. 15 gün parkda yatmışdıq”.

Qurbanov fevralın 6-da gecə saatlarında Türkiyənin müxtəlif şəhərlərində baş verən zəlzələ ilə bağlı məlumatları izlədiyini əlavə edib: “Çox adam ağır vəziyyətdədir, dağıntılar altında qalıb. Bildiyim qədərilə “Hatayspor”un idman direktoru Taner Savutun vəziyyəti qeyri-müəyyəndir. Onu yaxşı tanıyıram. “Fənərbağça”da komanda yoldaşım olan Volkan Dəmirəl də hazırda “Hatayspor”un baş məşqçisidir. Onun paylaşdığı videoları izləmişəm. Kahramanmaraşdakı insanların vəziyyəti daha acınacaqlıdır. Həmçinin Malatyadakı futbolçulardan da xəbər yoxdur. Ümumi vəziyyət çox pisdir. Allah köməkləri olsun”.

Qeyd edək ki, son məlumatlara görə, Türkiyədə baş vermiş 7,7 maqnitudalı zəlzələ nəticəsində 3 549 adam həlak olub, 22 168 nəfər yaralanıb, həmçinin təbii fəlakət nəticəsində 5 775 bina dağılıb.