Fransa klubunun futbolçusunun evi qarət edilib

Fransanın "Lion" klubunun futbolçusu Aleksandr Lyakazettin evi oyun zamanı qarət edilib.

"QELEBE.AZ" "Le Progres"ə istinadən xəbər verir ki, hadisə ölkə çempionatının XXXIV turunda baş tutan "Lion" - "Anje" (2:0) matçı zamanı yaşanıb.

Görüş başlayandan təxminən yarım saat sonra iki naməlum şəxs futbolçunun evinə daxil olub. Oğrular seyfi sındıraraq qızıl-zinət əşyaları, bahalı dəri aksesuarları və pul oğurlayıblar. Ümumi zərərin 10 min avrodan çox olduğu bildirilir. Polis hadisə ilə bağlı araşdırmalara başlayıb.

Qeyd edək ki, A.Lyakazett "Lion"un yetirməsidir. 2017-ci ildə "Arsenal"a (İngiltərə) transfer olunan futbolçu burada keçirdiyi 5 mövsümdən sonra geri qayıdıb.