Ölkədə ən klassik retro maşının sürücüsü: "Sakinlər və qonaqlar sərgidən zövq alırlar"

Paytaxt sakinləri və qonaqlar Bakıda keçirilən klassik avtomobillərin sərgisindən zövq alırlar.

"Report" xəbər verir ki, bu barədə "Sürətin evolyusiyası" layihəsi çərçivəsində keçirilən klassik avtomobillərin sərgisinin iştirakçısı Elmar Sərdərov açıqlama verib.

O, təqdim etdiyi maşının ölkənin ən retro klassik nəqliyyat vasitəsi olduğunu bildirib.

"Mercedes-Benz" şirkətinin istehsalıdır, bu model "Roselli" adlanır. İki il əvvəl ölkəyə gətirmişəm və keçən il ölkənin ən yaşlı maşını kimi qeydiyyatdan keçirmişəm. Kapotun altında öz motorudur, amma ötürmələr qutusu dəyişdirilib. Kabrioletdir, üstünü özüm açıb yığıram. İkilitrlik motorla maksimum 100 km/saat sürət yığmışam, amma spidometrdə 120-dir. Maşın üzərində bəzi restaylinq işləri görmüşəm".

Xatırladaq ki, bu gün başlayan sərgi sabah sürət avtomobillərinin nümayişi ilə davam edəcək.