“Qəbələ” rəsmisi: "Hazırda bir neçə futbolçu ilə danışıqlar aparırıq"

Azərbaycanın I Liqasında çempionluğu rəsmiləşdirən “Qəbələ” yeni mövsümlə bağlı bir sıra futbolçularla danışıqlara başlayıb.

Bu barədə “Report”a bölgə təmsilçisinin idman direktoru Səbuhi Səfiyarlı məlumat verib.

O, bəzi futbolçularla danışıqlar aparıldığını deyib:

“Yeni mövsümlə bağlı konkret qərarlar qəbul olunmayıb. Bununla belə, hazırda bir neçə futbolçu ilə danışıqlar aparırıq. Yəqin ki, komandanı tərk edəcək futbolçular olacaq. Növbəti çempionatın başlama tarixi hələ bilinmir. Hazırda davam edən mövsüm bitdikdən sonra komandanı istirahətə buraxacağıq”.

S.Səfiyarlı çempionluq münasibətilə keçiriləcək mükafatlandırma mərasimindən əvvəl heç bir proqram nəzərdə tutulmadığını bildirib:

“Sadəcə, Peşəkar Futbol Liqasından komandanın mükafatlandırılacağı bildirilib. Oyundan sonra adi qaydada mükafatlar veriləcək. Mövsümün sonu olduğu üçün kiçik tədbir keçirəcəyik. Gündüz saatlarında isə yeni sponsorla müqavilə imzalanacaq”.

Qeyd edək ki, 61 xalla turnir cədvəlinə başçılıq edən "Qəbələ" XXVI turda, mayın 15-də doğma meydanda "Zaqatala"nı qəbul edəcək.