Azərbaycan millisinin futbolçusu: "Belə bir vəziyyətdə "Radomyak"da qalmağın mənası yoxdur"

Belə bir vəziyyətdə "Radomyak"da qalmağın mənası yoxdur.

Bunu "QELEBE.AZ"a açıqlamasında Polşanın "Radomyak" komandasının futbolçusu Rahil Məmmədov deyib.

Azərbaycan millisinin müdafiəçisi cari mövsümün sonunda böyük ehtimalla klubdan ayrılacağını söyləyib:

"Bu mövsüm başa çatdıqdan sonra klubla birillik müqaviləm qalır. Lakin böyük ehtimalla sözləşməmə xitam veriləcək və komandadan ayrılacağam. Mən də meydana çıxmaq, komandama kömək etmək istəyirəm. Lakin görünən odur ki, baş məşqçinin oyun planlarına daxil deyiləm. Belə bir vəziyyətdə "Radomyak"da qalmağın mənası yoxdur. Futbolda bu cür hallar olur, narahatlığa əsas yoxdur. Ümid edirəm ki, özümə uyğun klub tapacağam və karyeramı davam etdirəcəyəm".

29 yaşlı futbolçu Azərbaycan klublarından birinə qayıdacağını istisna etməyib:

"Az əvvəl də vurğuladığım kimi, futbolda hər şəy ola bilər. Azərbaycan Premyer Liqasında klub sayı da artırılıb. Bəlkə elə bir təklif alaram ki, ölkəmə qayıdaram. Təbii ki, bu, klubun iddiasından və digər şərtlərdən asılıdır. Lakin Avropada oynamaq, Azərbaycanı xaricdə təmsil etmək daha yaxşıdır".