AFFA-nın əməkdaşı: "UEFA Akademiyasının təhsil proqramını fərqlənmə ilə bitirmək qürurvericidir"

AFFA-nın beynəlxalq oyunların təşkili üzrə meneceri Rasif Babayev UEFA Akademiyası və Lozanna Universitetinin birgə təşkil etdiyi UEFA CFM təhsil proqramını fərqlənmə ilə başa vurmasına münasibət bildirib.

O, "Report"a açıqlamasında təəssüratlarını bölüşüb.

R.Babayev proqramı fərqlənmə ilə bitirməsinin onun üçün qürurverici olduğunu söyləyib:

"Həm də məsuliyyətli bir hadisədir. Bu proqramı uğurla tamamlayan ilk azərbaycanlı əməkdaş deyiləm. Məndən əvvəl də AFFA nümayəndələri bu proqramda iştirak edərək uğurla məzun olublar. Onların sırasına qoşulmağıma çox sevindim. Proqramın məzmunu çox maraqlı və peşəkar inkişaf üçün olduqca faydalı idi. Müxtəlif ölkələrin təcrübələrini öyrənmək, yeni biliklər qazanmaq və beynəlxalq futbol şəbəkəsində yer almaq baxımından önəmli platformadır. Təhsil müddətində futbolun idarə olunması sahəsində strateji və əməliyyat yönümlü biliklər əldə etdim".

Beynəlxalq oyunların təşkili üzrə menecer qarşıdakı hədəflərdən söz açıb:

"Məqsədim əldə etdiyim bilik və bacarıqları gündəlik iş proseslərinə inteqrasiya etmək və AFFA-nın beynəlxalq oyunların təşkili sahəsində və xüsusilə öz departamentimdə tətbiq etməkdir".