“Xankəndi” klubunun rəsmisi: "Hədəfimiz AFFA Region Liqasının finalında oynamaqdır"

“Xankəndi” klubu AFFA Region Liqasının finalında oynamağı hədəfləyib.

Bunu “Report”a açıqlamasında bölgə təmsilçisinin icraçı direktoru Vasif İsmayılov deyib.

O, 1/8 finalda qarşılaşacaqları “Topçular” komandası haqqında ətraflı məlumata malik olmadıqlarını söyləyib:

“Çinar Zəngilan” və “Şirvan” finala gedən yolda əsas rəqiblərimizdir. Ümid edirəm ki, yaxşı oyun göstərərik və finala vəsiqə qazanmaq nəsib olar. “Topçular”la oyuna ciddi hazırlaşmışıq. 1/8 final bir oyundan barətdir, üstəlik, rəqib haqqında informasiyamız yoxdu deyə, işimiz çətindir. Buna baxmayaraq, bir hədəfimiz var və finalda oynamaq istəyirik”.

Klub rəsmisi çempionatda iştirak edən bir neçə komadanı xüsusi fərqləndirib:

“Çinar Zəngilan”, “Şirvan”, “Marafon” yaxşı komandalardır. Finalda bu kollektivlərdən biri ilə qarşılaşa bilərik. Xüsusən də “Çinar Zəngilan”ı qeyd etmək istərdim, güclü rəqibdir”.

O, “transfer pəncərəsi” bağlanana qədər heyətə iki futbolçu dəvət etmək istədiklərini bildirib:

“Futbolçuların adlarını çəkmək istəmirəm, amma danışıqlar gedir. “Transfer pəncərəsi”nin bağlanmasına az vaxt qalıb. Həmin futbolçuları heyətimizə qatmağa çalışırıq. Onlarla razılıq əldə etmişik. Sadəcə, klubları ilə ortaq məxrəcə gəlmək qalıb. Bu transferləri həyata keçirə bilsək, 1/8 final matçına çıxacaqlar”.

Qeyd edək ki, “Xankəndi” AFFA Region Liqasının 1/8 finalında “Topçular”la qarşılşacaq. Pley-off mərhələsi bir oyundan ibarət olacaq.