Avstraliyada içərisində timsahlar olan çay Yay Olimpiya Oyunları üçün yararsız hesab edilib
https://qelebe.az//uploads/photo/avstraliyada-icherisinde-timsahlar-olan-chay-yay-olimpiya-oyunlari-uchun-yararsiz-hesab-edilib.webp
Beynəlxalq Avarçəkmə Federasiyası Avstraliyanın Kvinslend ştatında içərisində timsahlar olan Fitsroy çayını 2032-ci ildə keçiriləcək Yay Olimpiya Oyunları üçün yararsız hesab edib.
"Report" qurumun mətuat xidmətinə istinadən xəbər verir ki, Fitsroy çayı daha əvvəl ştat hökuməti tərəfindən Yay Olimpiya və Paralimpiya Oyunları zamanı avarçəkmə yarışlarına ev sahibliyi etmək üçün təklif olunub.
Lakin federasiya sözügedən ərazidə təhlükəsizliyin yetərli olmadığı qənaətinə gəlib. Halbuki, Fitsroy çayı son illərdə Avstraliyanın avarçəkmə üzrə Olimpiya komandasının məşq məkanı olub. Burada mütəmadi olaraq universitetlərarası yarışlar keçirilib.
Qeyd edək ki, 2032-ci il Yay Olimpiya Oyunları Brisben şəhəri və ətraf Cənub-Şərqi Kvinslend bölgəsində keçiriləcək. Brisben Oyunlara ev sahibliyi edəcək üçüncü Avstraliya şəhəri olacaq. Əvvəllər analoji turnir Melburn (1956) və Sidneydə (2000) təşkil edilib.
