Azərbaycan Cüdo Federasiyasının rəsmisi: "Kişilərdən ibarət yığma "Böyük Dəbilqə"də gözlənilən nəticəni göstərdi"

Ümumilikdə götürsək, kişilərdən ibarət yığma "Böyük Dəbilqə"də gözlənilən nəticəni göstərdi.

Bunu "QELEBE.AZ"a açıqlamasında Azərbaycan Cüdo Federasiyasının icraçı vitse-prezidenti Rəşad Rəsullu deyib.

Qurum rəsmisi komandanın orta səviyyədə çıxış etdiyini bildirib:

“Hesab edirik ki, komanda ümumilikdə orta səviyyədə çıxış etdi. Nəzərə alaq ki, Hidayət Heydərov, Zelim Kotsoyev, Elcan Hacıyev, Turan Bayramov, Vüqar Talıbov, Murad Fətiyev və bir sıra idmançılarımız zədə və müxtəlif səbəblərdən bu yarışda iştirak etmirdilər. Ona görə də əvvəlki illərə nisbətən daha zəif çıxış etdik. Ümumilikdə götürsək, kişilərdən ibarət yığma gözlənilən nəticəni göstərdi. Təbii ki, bəzi idmançılar öz üzərlərində işləməlidirlər. “Böyük Dəbilqə” həm də daha böyük yarışlara hazırlıq üçün sınaqdır. Çatışmazlıqları görürük və növbəti mərhələlərdə onları aradan qaldırmaq üçün işimizi davam etdirəcəyik”.

İcraçı vitse-prezident təşkilatçılığın yüksək səviyyədə olmasının arxasında böyük komanda işi dayandığını söyləyib:

“Azərbaycan Cüdo Federasiyasının istər “Böyük Dəbilqə”, istər regional və ölkədaxili, istərsə də digər beynəlxalq səviyyədə yarışları təşkil etmək üçün böyük təcrübəsi var. Bu sahədə çalışan böyük komandamız var. Beynəlxalq Cüdo Federasiyası ilə qarşılıqlı əməkdaşlıq edirik. Qeyd etdiyiniz kimi, federasiya rəsmi saytı vasitəsilə həmişə olduğu kimi ən yaxşı tədbirlərdən birinin keçirildiyini vurğulayıb. Hər il təşkilatçılıq səviyyəsini daha da artırırıq. Bunun arxasında böyük komanda işi dayanır. Təxminən 250-300 insan çalışır. Bu, federasiyanın və tərəfdaş təşkilatların birgə əməyinin nəticəsidir”.

R.Rəsullu dünya çempionatını da yüksək səviyyədə təşkil edəcəklərinə əmindir:

“Qarşıdan dünya çempionatı gəlir. “Böyük Dəbilqə” bizm üçün bir test yarışı oldu. Əminik ki, dünya çempionatını da yüksək səviyyədə keçirəcəyik”.

Qeyd edək ki, “Böyük Dəbilqə” turniri fevralın 14-16-da Milli Gimnastika Arenasında keçirilib. Azərbaycan cüdoçuları yarışı 5 medalla başa vurublar. Zelim Tçkayev (81 kq) qızıl, Rəşid Məmmədəliyev (73 kq) gümüş, Vüsal Qələndərzadə (73 kq), Əhməd Yusifov (60 kq) və Elşən Əsədov (66 kq) bürünc medala sahib çıxıblar. Azərbaycan turnirdə 32 idmançı ilə təmsil olunub.