“Liverpul”un yarımmüdafiəçisi klubu tərk edəcəyinə dair yayılmış şayiələrə aydınlıq gətirib

“Liverpul”un hücumameyilli yarımmüdafiəçisi Harvi Elliot yay transfer pəncərəsində klubu tərk edəcəyinə dair yayılmış şayiələrə aydınlıq gətirib.

“Report” xəbər verir ki, bu barədə 21 yaşlı futbolçu “Daily Mail”in idman müxbiri Lyuis Stilin müvafiq sualını cavablandırarkən danışıb.

“Liverpul” mənim klubum, mənim komandamdır. Burada öz yerim, komandadakı öz mövqeyim uğrunda mübarizə aparmaq istəyirəm”, – o deyib.

İdmançı təslim olmayacağını, mübarizə aparacağını vurğulayıb: “Mən buna nail olmaq üçün səy göstərməli, inadla çalışmalı və istəkli olmalıyam. Mən təslim olmayacağam, mübarizə aparmağa davam edəcəyəm”.

O, öz şansını gözləyəcəyini, komandasına “bacardığı qədər” yardımçı olacağına söz verib: “Nə vaxt lazım olsam, şansımı gözləyirəm. Mövsümün başlanğıcında zədələndiyimə görə kənarda qaldım. Dərhal meydana çıxıb oynamağı gözləmirəm, lakin komandama bacardığım qədər kömək etmək istəyirəm. Məqsədim kömək etmək və əlimdən gələni etməkdir”.

Qeyd edək ki, Harvi Elliott 2019-cu ildə “Fulhem”dən “Liverpul”a keçib. O, əsas komandada 16 yaşında debüt edərək klubun tarixində buna nail olmuş ən gənc oyunçulardan biri olub.