Azərbaycan Basketbol Federasiyasının rəsmisi: “Böyük ehtimalla Çempionlar Kubokuna qatılacağıq”

Böyük ehtimalla Çempionlar Kubokuna qatılacağıq.

Bunu “Report”a açıqlamasında Azərbaycan Basketbol Federasiyasının (ABF) baş katibi Vüqar Əzimov FIBA-nın yeni təsis etdiyi 3x3 basketbol üzrə Çempionlar Kubokuna qatılmaq perspektivi ilə bağlı danışarkən deyib.

Qurum rəsmisi böyük ehtimalla bu yarışda iştirak edəcəklərini söyləyib:

“Çempionlar Kuboku barədə daha dolğun məlumat yanvarın əvvəllərində olacaq. 2025-ci ilin mayında isə Bakıda Dünya Kubokunun seçmə mərhələsi keçiriləcək. Çox önəmli turnirdir. Ciddi yanaşırıq deyə, bütün diqqətimizi bura yönəltmişik. Artıq üçüncü ildir ki, bu yarışda iştirak edirik. Böyük ehtimalla Çempionlar Kubokuna qatılacağıq. Ancaq bu, sonranın işidir. Həmçinin fevralda kişilərdən ibarət millimizin Kosovo və İrlandiyaya qarşı matçları var. Qadınlardan ibarət yığmanın da oyunları var. Söhbət basketbol komandalarımızdan gedir. Hazırda iştirak edəcəyimiz yarışlar bunlardır”.

O, Bakıda keçiriləcək Dünya Kubokunda qadınlardan ibarət milliyə daha böyük ümidlər bəslədiklərini vurğulayıb:

“Həm kişilərdən, həm də qadınlardan ibarət millimiz yayda keçiriləcək seçmə mərhələ oyunlarına ən güclü heyətlə qatılacaqlar. Bu yarışın qalibi iyulda Monqolustanda keçiriləcək dünya çempionatına vəsiqə qazanacaq. Azərbaycan tarixində ilk dəfədir ki, Dünya Kubokunun seçmə mərhələsi Bakıda keçiriləcək. Bildiyiniz kimi, Azərbaycanın qadınlardan ibarət 3x3 basketbol komandası Parisdə keçirilən Yay Olimpiya Oyunlarında iştirak etdi. Amma indiyə qədər dünya çempionatında heç bir Azərbaycan komandası olmayıb. Əlbəttə, xüsusilə qadınlardan ibarət yığmaya ümidlərimiz böyükdür. Çünki onların təcrübəsi kişilərə nisbətən daha çoxdur”.

Qeyd edək ki, Azərbaycan 3x3 basketbol üzrə Dünya Kubokunun seçmə mərhələ oyunlarına ilk dəfə ev sahibliyi edəcək. 2025-ci il mayın 24-25-də Bakıda baş tutacaq qarşılaşmalarda həm kişi, həm də qadınlardan ibarət 6 komanda mübarizə aparacaq.