Premyer Liqa: "Qəbələ" "Kəpəz"i, "Sumqayıt" "Zirə"ni qəbul edəcək

Futbol üzrə Azərbaycan Premyer Liqasında bu gün XI turun daha iki oyunu keçiriləcək.

"Report"un məlumatına görə, hər iki qarşılaşma paytaxtdan kənarda baş tutacaq.

Günün ilk matçında "Qəbələ" "Kəpəz"i qəbul edəcək. Meydan sahibləri 16 xalla 5-ci, qonaqlar 4 xalla 8-ci pillədə qərarlaşıb. Komandalar indiyədək ölkə çempionatlarında 21 dəfə üz-üzə gəlib. Bunların 10-da "qırmızı-qaralar", 6-da Gəncə təmsilçisi meydanı 3 xalla tərk edib. Topların nisbətində də "Qəbələ" üstündür - 28:17.

İkinci görüş Sumqayıtda olacaq. Şəhərin eyniadlı kollektivi "Zirə" ilə üz-üzə gələcək. "Gənclik şəhəri" təmsilçisi 4 xalla 9-cu, "qartallar" 16 xalla 4-cü sıradadır. Tərəflər Premyer Liqada 28 dəfə görüşüblər. Əvvəlki oyunların 14-də paytaxt klubu, 6-da meydan sahibləri qələbə qazanıb. Topların nisbətində qonaqların üstünlüyə malikdir - 35:21.

Azərbaycan Premyer Liqası, XI tur

22 oktyabr (şənbə)

16:00. “Qəbələ” – “Kəpəz”
Hakimlər: Rəşad Əhmədov, Elşad Abdullayev, Kamran Bayramov, Əli Əliyev
Hakim-inspektor: İmanxan Sultani
Qəbələ şəhər stadionu

18:30. “Sumqayıt” – “Zirə”
Hakimlər: Fərid Hacıyev, Eyyub İbrahimov, Cəmil Quliyev, Namiq Bəkirov
Hakim-inspektor: Orxan Məmmədov
“Kapital Bank Arena”

Qeyd edək ki, turun ilk matçında "Qarabağ" "Turan Tovuz"u 3 cavabsız qolla üstələyib. Tura oktyabrın 23-də "Səbail" - "Şamaxı" və "Neftçi" - "Sabah" qarşılaşmaları ilə yekun vurulacaq.