Azərbaycan millisinin qapıçısı: Hakimlər bəzi epizodlarda tərəfkeşlik edirdilər

Hakimlər yerli olduqları üçün öz millilərinə simpatiyaları görünürdü. Bəzi epizodlarda çox tərəfkeşlik etdilər.

Bunu "QELEBE.AZ"a açıqlamasında Azərbaycanın futzal millisinin qapıçısı Emin Kürdov Gürcüstana uduzduqları yoldaşlıq görüşləri (2:3, 1:2) barədə danışarkən deyib.

39 yaşlı qolkioer bu qarşılaşmalarda yaxşı mübarizə apardıqlarını bildirib: "İki görüşdə də minimal hesabla uduzduq. Heyətimiz yenidən qurulur. Oyunçuların əksəriyyəti gəncdir, U-19 yığmasından da futzalçılar cəlb edilib. Rəqibin heyətində 4-5 legioner olduğunu da bilirdik. Gürcüstan millisi təcrübəli kollektivdir, Avropa və dünya çempionatlarında iştirak ediblər. Çətin olacağını bilirdik. Amma oyunçular əzmkarlıq göstərdilər. Şəxsən mən gələcəyə görə ümidləndim".

E.Kürdov yaxşı nəticələr əldə etmək üçün gənclərin təcrübə toplamalı olduqlarını diqqətə çatdırıb: "Tez-tez təlim-məşq toplanışları keçirməli, matçlar oynamalıyıq. Yaxşı oyunçularımız var. Nəticələr də qazana bilərik. Son qarşılaşmalar da bunu göstərdi. İkinci matçda hesab 1:1 idi. Rəqib sonlara yaxın fərqləndi. Ani səhv oldu. Həqiqətən ümidverici görüşlər idi. Bu uşaqlara şans vermək və onlarla işləmək lazımdır. Bizim üçün yaxşı səfər oldu. Bərabər səviyyədə matçlar oynadıq".