Azərbaycan millisinin baş məşqçisi: Monteneqro toplanışı zəif və güclü cəhətlərimizi üzə çıxaracaq

Monteneqro toplanışı zəif və güclü cəhətlərimizi üzə çıxaracaq.

Bunu “Report”a açıqlamasında minifutbol üzrə Azərbaycan millisinin baş məşqçisi Elşad Quliyev Monteneqroda təşkil olunacaq təlim-məşq toplanışı barədə danışarkən deyib.

Mütəxəssis orada keçiriləcək beynəlxalq turnirin yığmaya çox kömək edəcəyini düşünür: “Turnir komandamıza təcrübə qazandıracaq. Oradakı təlim-məşq toplanışı və beynəlxalq turnirdəki oyunlar Avropa çempionatı öncəsi zəif və güclü cəhətlərimizi görməyimizə kömək olacaq. Həm də yeni futbolçuları sınaqdan keçirə biləcəyik. Bir sözlə, komandamıza çox xeyri dəyə bilər”.

E.Quliyev ötən gün açıqlanan yığmanın 20 nəfərlik ilkin siyahısında dəyişikliklər olduğunu sözlərinə əlavə edib: “Millinin tam heyəti bu günlərdə açıqlanacaq. Bəzi oyunçuları çağırmasaq da, onlar nəzərimizdədirlər. İlkin heyətdə müəyyən dəyişikliklər var. Aprelin 23-də axşam saatlarında Monteneqroya yola düşəcəyik. Ona qədər hələ vaxtımız var. Hər gün heyətə yeni simalar cəlb edə bilirik”.

Baş məşqçi Avropa çempionu olduqları heyəti qoruyacaqlarını vurğulayıb: “Avropa çempionu olan və dünya çempionatında iştirak edən heyətin özəyini qorumuşuq. Bir neçə yeni futbolçu da dəvət etmişik. Azərbaycan çempionatının yarımfinal mərhələsinin cavab oyunlarına baxdıqdan sonra ideal heyət müəyyənləşəcək. Futbolçuların əsl gücləri məhz pley-off qarşılaşmalarında görünür. Millinin qapıları hamının üzünə açıqdır. Monteneqro toplanışından sonra da yeni oyunçular dəvət edə bilərik”.

Qeyd edək ki, Azərbaycan yığması aprelin 24-dən mayın 2-dək Monteneqroda təlim-məşq toplanışında olacaq. Komanda aprelin 30-da Serbiya, Bosniya və Herseqovina, Rumıniya, Monteneqro və Albaniyanın qatılacağı turnirdə iştirak edəcək. Toplanış Bosniya və Herseqovinanın paytaxtı Sarayevoda keçiriləcək Avropa çempionatına hazırlıq məqsədi daşıyır.