Bolqarıstan millisinin üzvü: Azərbaycana qarşı matçda daha çox güc sərf etdik

Etiraf edim ki, Azərbaycan millisi ilə matçda daha çox güc sərf etdik.

Bunu "Report"a açıqlamasında Bolqarıstan millisinin üzvü Filip Krastev "FIFA series Edition - 2024" layihəsi çərçivəsində keçirilən Azərbaycanla matç barədə danışarkən bildirib.

Futbolçu nəticənin (1:1) ədalətli olduğunu bildirib: "Azərbaycan millisi ilə matç olduqca maraqlı alındı. Rəqib inamlı mübarizə apardı. Hesabda geri olmalarına baxmayaraq, oyunun sonlarında layiq olduqları qolu vurdular. Bəli, nəticə kifayət qədər ədalətlidir. Oxşar keyfiyyətlərə malik iki komanda meydanda mübarizə aparırdı".

Krastev qol vurmasından danışıb: "Əlbəttə, fərqlənmək olduqca gözəl hissdir. Millinin heyətində qol vurduğum üçün qürur duyuram. Amma qələbə qazanmaq daha yaxşı olardı".

22 yaşlı mərkəz yarımmüdafiəçisi Bolqarıstan millisinin çıxışına toxunub: "Hazırkı turnir milli komanda üçün böyük təcrübə oldu. Daha yaxşısını edə bilərdik".

O, Azərbaycan millisini digər rəqiblərdən fərqləndirib: "Tanzaniya ilə matç çətin alınmışdı. Amma Azərbaycan millisi onlarla müqayisədə topu daha rahat, sərbəst saxlaya bilirdi. Onlar layiqli rəqibdirlər".

Qeyd edək ki, Tofiq Bəhramov adına Respublika stadionunda baş tutan Azərbaycan - Bolqarıstan görüşü 1:1 hesabı ilə yekunlaşıb.