Azərbaycan güləşçisi olimpiya çempionluğunu arzulayır

Azərbaycanın yunan-Roma güləşçisi Sənan Süleymanov (77 kq) Paris-2024 Yay Olimpiya Oyunlarının çempionluğunu arzulayır.

Bunu “QELEBE.AZ”a açıqlamasında 27 yaşlı idmançı bildirib.

O, fevralda Rumıniyanın paytaxtı Buxarestdə keçiriləcək Avropa çempionatında ikinci dəfə fəxri kürsünün ən yüksək pilləsinə qalxmaq əzmindədir: “Avropa çempionatına hazırlaşırıq. Xorvatiyada yerli komanda və bir çox ölkənin idmançıları ilə birgə təlim-məşq toplanışı keçirik. Qitə birinciliyi öncəsi son toplanış Bakıda olacaq. Hədəfim 2020-ci ildən sonra ikinci dəfə Avropa çempionu olmaqdır. Ancaq bütün titullar olimpiadanın medalının yanında kölgədə qalır. Mən də olimpiadaya mümkün qədər yaxşı hazırlaşacağam ki, orada ölkəmizi yüksək səviyyədə təmsil edim”.

Sənan Süleymanov çempion olduğu “Zaqreb Open” turnirində gərgin mübarizə alındığını sözlərinə əlavə edib: “Gözlədiyimdən ağır yarış keçdi. Hər ölkə güclü idmançılarla təmsil olunurdu. Rəqiblər çox güclü idilər. Sanki dünya çempionatında yarışırdıq. Qırğız və erməni idmançıdan başqa, hamı gərgin mübarizə aparırdı”.

Yunan-Roma güləşçisi Xorvatiyadakı turnirdə iki rəqibi üzərində qələbəni xüsusi vurğulayıb: “Xorvatiyaya çempionluq üçün gəlmişdim. Mənim üçün adi reytinq turniri olduğundan, xüsusi hiss yaşamadım. Sadəcə, prinsipiallıq daşıyan bəzi görüşlər oldu. Almaniyalı güləşçiyə iki il əvvəl dünya çempionatında məğlub olmuşdum. Bu dəfə 33 saniyə ərzində ona 9:0 hesabı ilə qalib gəldim. Türkiyəli rəqibimə isə məni bundan əvvəlki iki turnirdə hakimlər uduzdurublar. Burada əvəzini çıxdım”.

Qeyd edək ki, Sənan Süleymanov 2023-cü ilin sentyabrında Serbiyanın paytaxtı Belqradda keçirilən dünya çempionatında gümüş medal qazanaraq, Paris-2024 Yay Olimpiya Oyunlarına lisenziya əldə etmişdi.