2023-cü ildə uğur qazanan uşuçularla görüş keçirilib

2023-cü ildə uşu üzrə Dünya Oyunları (Ər-Riyad, Səudiyyə Ərəbistanı), dünya çempionatı (Texas, ABŞ) və Avropa çempionatında (İstanbul, Türkiyə) uğur qazanan idmançılarla görüş keçirilib.

“Report”un məlumatına görə, görüşdə Azərbaycan Uşu Federasiyasının (AUF) prezidenti Azər Həsənsoy, vitse-prezidenti Namiq Əsgərov, Gənclər və İdman Nazirliyinin sektor müdiri Aydın Məmmədov, kurator Əliniyaz Mirzəyev və Azərbaycan Çin Döyüş Növləri Assosiasiyasının prezidenti Asif Sayadov iştirak ediblər.

İlk olaraq Namiq Əsgərov idmançıları və məşqçiləri təbrik edib, 2024-cü ildə baş tutacaq yarışlarda onlara uğurlar arzulayıb. Ardından nazirliyin əməkdaşları təbriklərini çatdırıblar.

Azər Həsənsoy il ərzində uşuçuların 5 mötəbər yarışda iştirak etdiklərini bildirib, onların uğurlarından və səhvlərindən danışıb. O, göstərilən dəstəyə görə gənclər və idman nazirı Fərid Qayıbova, nazir müavini Mariana Vasilevaya və idman şöbəsinin müdiri Elnur Məmmədova təşəkkürünü bildirib.