Həndbol üzrə Azərbaycan çempionatı: “Qarabağ” ardıcıl 5-ci qələbəsini qazanıb

Qadın həndbolçular arasında Azərbaycan çempionatında V tura start verilib.

“Report”un məlumatına görə, ilk gündə “AHF Arena” İdman Kompleksində iki oyun keçirilib.

Lider “Qarabağ” yoluna itkisiz davam edir. Adı çəkilən komanda autsayderlər zonasında qərarlaşan “Bakı”nı asanlıqla məğlub edərək (41:12), ardıcıl 5-ci qələbəsini qazanıb.

“İdman Akademiyası” ilə “Gənclər Birliyi” arasında baş tutan mübarizədən isə birincilər qalib ayrılıblar. Rəqibinə 20:28 hesabı ilə uduzan “Gənclər Birliyi” bu dəfə də xala həsrət qalıb.

Qeyd edək ki, qadınların yarışında turun son oyunu dekabrın 16-da “Azəryol”la “Kür” arasında keçiriləcək. Dekabrın 16-17-də isə kişilər arasında ölkə çempionatında V turun qarşılaşmaları gerçəkləşəcək.