Türkiyədə futbol klubunun prezidenti matçdan sonra hakimi döyüb

Türkiyənin “Ankaragücü” futbol klubunun prezidenti Faruk Koca ölkə çempionatında "Rizəspor"la oyundan sonra meydana qaçaraq hakim Umut Melerin sifətinə zərbələr endirib.

Bu barədə “Report” “Sport24”ə istinadən xəbər verir.

Qeyd olunub ki, zərbədən sonra hakim qazona yıxılıb və daha bir neçə zərbə alıb. Hakimin özü ayağa qalxa bilib. Sol gözünün altında isə qançır yaranıb. O, hakim otağında müalicə olunub.

Görüş 1:1 hesabı ilə başa çatıb. “Rizəspor” əlavə edilən yeddinci dəqiqədə hesabı bərabərləşdirə bilib. Türkiyə çempionatının turnir cədvəlində “Ankaragücü” 18 xalla 11-ci yerdədir. “Rizəspor” 22 xalla səkkizinci pillədə qərarlaşıb.