"Qarabağ"ın 83 yaşlı rəqibi: İlk çempionluğunu yaşayan və qruplarda debüt edən komanda

"Qarabağ"ın UEFA Avropa Liqasının qrup mərhələsində rəqiblərindən olan İsveçin "Hakken" klubu 1940-cı ildə yaradılıb.

"Report" xatırladır ki, daha əvvəl aşağı liqalarda mübarizə aparan komanda 1983-cü ildə Allsvenskanda (əsas çempionat) debüt edib. 2006-cı ildə Superettana (ikinci liqa) düşən "Hakken" 2008-ci ildə toparlanaraq yenidən yüksək dəstəyə qayıdıb.

Höteborq təmsilçisi ev oyunlarını 6 500 azarkeş tutumuna malik "Bravida Arena"da keçirir. Klubun hazırkı prezidenti Anders Billstrom, baş məşqçisi isə norveçli Per-Matias Xyoqmodur.

"Hakken" 14-15 yaşlı gənclərdən ibarət qrup tərəfindən qurulub. Liqada mübarizə aparmaq istəyən oyunçular ilk olaraq Höteborq Futbol Assosiasiyasına, daha sonra yerli federasiyaya müraciət ediblər. Komanda üç il yalnız gənclər arasında çempionatlara qatılıb, 1943-cü ildən isə liqa sisteminə keçid edib.

Klub Allsvenskanda yeganə çempionluğunu ötən il əldə edib. "Qarabağ"ın rəqibi 2012-ci ildə buna yaxın olsa da, 59 xalla çempion olan "Elfsborq"dan 2 xal az toplayaraq gümüş medalla kifayətlənib. Buna baxmayaraq, "Hakken" ölkə kubokunun üçqat qalibidir. "Sarı-qaralar" 2015/2016, 2018/2019 və 2022/2023 mövsümündə titula sahib çıxıblar.

Ölkə çempionu cari mövsüm tarixində ilk dəfə avrokubokların qrup mərhələsinə vəsiqə qazanıb. Komanda daha əvvəl yalnız iki dəfə UEFA Avropa Liqasında III təsnifat mərhələsinə qədər irəliləyə bilmişdi.

İslandiyalı Valgeir Lunddal, tunisli Amor Layouni və Ali Youssef, isveçli Samuel Qustafson, yamaykalı Bler Turqott və zambiyalı Edvard Çilufya ölkələrinin milli komandalarında çıxış edirlər. "Hakken"in heyətinin “transfermarkt” portalında ümumi dəyəri 23,25 milyon avrodur. Bu isə İsveçdə "Malmö"dən (30,65 milyon avro) sonra ən yaxşı ikinci göstəricidir.

Qeyd edək ki, "Qarabağ" bu rəqiblə ilk matçını oktyabrın 5-də, II turda səfərdə keçirəcək. Sonuncu - VI turun qarşılaşması isə dekabrın 14-də Bakıda reallaşacaq.