Baş məşqçi: "Parataekvandoçularımızın uğurları Paris-2024 Yay Paralimpiya Oyunlarına lisenziya xalları qazandırır"

Bu ilin avqustunda Avropa paralimpiya çempionatı, açıq dünya çağırış yarışı və Qran-pridə parataekvandoçularımızın qazandığı uğurlar gələn il baş tutacaq Paris-2024 Yay Olimpiya və Paralimpiya Oyunlarına lisenziya xalları qazandırır.

Bunu "Report"a beynəlxalq yarışlarda uğurla çıxış edən parataekvondo üzrə milli komandanın baş məşqçisi Fərid Tağızadə deyib.

Mütəxəssis bildirib ki, avqustda keçirilən beynəlxalq yarışlarda medallar qazanan idmançılarımız dünya reytinqində ilk sıralarda qərarlaşıblar:

"İmaməddin Xəlilov (70 kq, K-44) dünya reytinq sıralamasında ikinci, Sabir Zeynalov (58 kq, K44) üçüncü, Əbülfəz Abuzərli (80 kq, K-44) altıncı, Röyalə Fətəliyeva (52 kq, K44) isə səkkizinci yerdədir".

Qeyd edək ki, parataekvondoçularımız 14-16 avqust tarixlərində Niderlandın Rotterdam şəhərindəki Avropa paralimpiya çempionatında 2 qızıl, 1 gümüş və 2 bürünc medal qazanıblar. Cənubi Koreyanın Çhunçhon şəhərində keçirilən açıq dünya çağırış yarışında komandamız 1 qızıl, 1 bürünc medala sahib çıxıb. Fransanın paytaxtı Parisdə baş tutan parataekvondo üzrə Qran-pridə isə 3 bürünc medalla kifayətləniblər.