Çempionlar Liqası: Mahir Emreli oynayıb, "Dinamo" qələbə qazanıb

UEFA Çempionlar Liqasında II təsnifat mərhələsinin daha bir cavab oyunu keçirilib.

"QELEBE.AZ"un məlumatına görə, Azərbaycan millisinin hücumçusu Mahir Emrelinin çıxış etdiyi Xorvatiyanın "Dinamo" (Zaqreb) komandası Qazaxıstanda "Astana"nın qonağı olub.

Görüş Zaqreb təmsilçisinin qələbəsi ilə başa çatıb - 2:0. İlk qol 24-cü dəqiqədə vurulub. Matça start heyətində başlayan Emrelinin fəallığından sonra meydan sahiblərinin müdafiəçisi Aleksandr Maroçkin topu öz qapısından keçirib. Azərbaycanlı futbolçu 78-ci dəqiqədə Yosip Drmiçlə əvəzlənib. Qonaqların ikinci qoluna isə 89-cu dəqiqədə Antonio Marin imza atıb.

Qeyd edək ki, ilk oyunda rəqibini 4:0 hesabı ilə darmadağın edən "Dinamo" iki görüşün nəticəsinə əsasən III raunda yüksəlib.