"Benfika"nın sabiq yarımmüdafiəçisi: "Bura gələnədək Azərbaycan futbolu haqqında heç nə bilmirdim"

"Səbail"in yay "transfer pəncərəsi"ndə heyətinə qatdığı futbolçulardan biri də Pedro Nunudur. 28 yaşlı portuqaliyalı yarımmüdafiəçinin karyerasının böyük hissəsi əsasən ölkəsinin klubları ilə bağlıdır. "Akademika", "Benfika", "Tondela", "Moreyrense" və B-SAD komandarında çıxış etmiş oyunçu son olaraq Türkiyə "Adanaspor"unun formasını geyinib.

Pedro Nunu "QELEBE.AZ"a müsahibəsində həm "Səbail"ə gəlişindən, həm karyerasından, həm də gələcək hədəflərindən söz açıb.

- Azərbaycana, "Səbail" klubuna xoş gəlmisiniz. Artıq bir müddətdir komandanın düşərgəsindəsiniz. İlk təəssüratlarınız necədir?
- İlk təəssüratlarım olduqca yaxşıdır. Əla şəraiti olan, yaxşı təşkilatlanmış komandaya gəlmişəm. Çempionatda oynamaq üçün çox həyəcanlıyam.

- Bakı klubuna keçidiniz necə gerçəkləşdi?
- Deyərdim ki, hər şey çox asan alındı. Menecerim mənə təklif barədə məlumat verdi. Bir neçə söhbətdən sonra klubdakı insanların mənimlə həqiqətən çox maraqlandıqlarını gördük. Nəticədə buraya gəlməyi qəbul etdim.

- "Səbail"i seçməyinizdə əsas amil nə oldu?
- Klubun gələcək planları, layihəsi və insanların etimad göstərməsi məni buraya gətirən əsas səbəblərdir.

- Bura gəlməmişdən əvvəl Azərbaycan futbolu haqqında nə bilirdiniz?
- Açığı, praktiki olaraq heç nə bilmirdim. Amma gördüklərimə əsasən deyə bilərəm ki, burada çox keyfiyyətli oyunçular var.

- "Qarabağ" barədə də eşitməmişdiniz?
- Bəli, yalnız bu komanda haqqında məlumatım var idi. Bu da onların demək olar, hər il Çempionlar Liqasında oynaması ilə bağlıdır.

- Azərbaycanda portuqaliyalı futbolçular çıxış ediblər və hazırda da oynayırlar. Maraqlıdır, "Səbail"dən təklif gələndə həmin oyunçuların hansından məsləhət aldınız?
- Menecerim yalnız ötən mövsüm burada oynayan Qustavo de Fransa ilə danışdı. O isə klub haqqında ancaq xoş sözlər söylədi.

- İndiyədək Portuqaliya və Türkiyədə oynamısınız. Əvvəlki klublardan hansıların şəraitini "Səbail"in infrastrukturu və imkanları ilə müqayisə edə bilərsiz?
- "Səbail"in infrastrukturu və şəraiti indiyədək oynadığım əksər klublardan daha yaxşıdır. Bu, xaricdən gələn oyunçu üçün çox vacibdir.