Azərbaycanlı qrossmeyster: “Öz oyunumu göstərsəm, Dünya Kubokunda böyük uğur qazanaram”

“Öz oyunumu göstərə bilsəm, Dünya Kubokunda böyük uğur qazanaram”

Bunu “Report”a müsahibəsində Azərbaycan şahmatçısı Şəhriyar Məmmədyarov iyulun 29-da Bakıda start götürəcək Dünya Kubokundakı hədəfləri barədə danışarkən deyib.

38 yaşlı qrossmeyster mötəbər yarışlarda uğursuzluğa son qoymaq istədiyini bildirib: “Dünya Kuboku özümü ən yaxşı tərəfdən göstərə biləcəyim turnirdir. Təəssüf ki, uzun illərdir bu yarışda tam performansımı sərgiləyə bilmirəm. Bir neçə il əvvəl Dünya Kubokunda 1/4 finala qədər uğurla irəlilədim, ancaq həmin mərhələdə mübarizəni dayandırdım. Düşünürəm ki, həmin vaxtlar çox stressli idim. Yəqin ki, bu dəfə daha rahat oynayaram”.

O, dünyanın bir nömrəli şahmatçısı Maqnus Karlsendən çəkinmədiyini söyləyib: “Karlsen üzərində qələbələrimiz az olmayıb. O, dünyanın bir nömrəli şahmatçısıdır. Bunu heç kim müzakirə etmir. Amma onu dəfələrlə məğlub etmişik. Karlsen özü də heç vaxt Dünya Kubokunun qalibi ola bilməyib. Onun uğur qazana bilmədiyi yeganə turnir məhz Dünya Kubokudur”.

Şəhriyar Məmmədyarovun müsahibəsinin tam versiyasını buradan oxuya bilərsiniz.