“İnter Mayami” futbol klubu Messi ilə müqavilə imzalayıb

Amerikanın “İnter Mayami” futbol klubu argentinalı hücumçu Lionel Messi ilə müqavilə imzalayıb.

“Report” xəbər verir ki, bu barədə komandanın mətbuat xidməti məlumat yayıb.

Futbolçu ilə müqavilə 2025-ci il mövsümünün sonuna kimi hesablanıb.

“Karyeramda növbəti addım üçün çox həyəcanlıyam. Bu, fantastik bir fürsətdir və biz birlikdə heyrətamiz bir layihə qurmağa davam edəcəyik. İdeya qarşıya qoyulan məqsədlərə çatmaq üçün birlikdə işləməkdir və mən həqiqətən yeni komandama kömək etmək istəyirəm”

Messinin 36 yaşı var və 2003-2021-ci illərdə “Barselona”da çıxış edib. O, 10 dəfə İspaniya çempionu, 7 dəfə İspaniya Superkubokunun və ölkə kubokunun qalibi, 4 dəfə Çempionlar Liqasının qalibi, 3 dəfə UEFA Superkubokunun və Klublararası Dünya Çempionatının qalibi olub.

2021-ci ildə Messi ilin ən yaxşı oyunçusuna verilən “Qızıl top” mükafatını 7-ci dəfə almaqla rekorda imza atıb. 2021-2023-cü illərdə argentinalı iki dəfə Fransa çempionu, bir dəfə isə ölkə Superkubokunu qazandığı Fransa PSJ-də çıxış edib.